اعداد و شمار ۽ ڀيٽ

انسان جي روزمره جي زندگي ۾ اعداد و شمار ڳڻپ ۽ حساب ڪتاب جي تمام گھڻي اهميت آهي .جنهنجي ڪري انسان پنهنجو ڪاروبار۽ زندگي کي جاري و ساري رکي ٿو،ان سان گڏوگڏ انهن شين انسان جي ترقي ۾ به نمايان ڪردار ادا ڪيو آهي.

ٻئي جيڪا اهم شيءِ جنهن انسان کي پنهنجي زندگي جي معيار کي بلند ڪرڻ ۾ مدد ڪئي آهي سا آهي،ڀيٽ ڪرڻ.شين ۾ فرق ڏسڻ پوءِ انهن کي بهتر کان بهتر بڻائڻ.

اهي ٻئي شيون آهن ته مثبت پرانهن جي هڪ حد آهي.انهن جو هڪڙو احاطو آهي.رانديون ته هلن ئي اعداد و شمار ۽ ڀيٽ تي.

پر اهي ٻه ئي شيون جيڪڏهن انسانن تي لاڳو ڪيون وڃن ٿيون ته پوءِ اهي معاشري لاءِ تمام خطرناڪ ثابت ٿين ٿيون.پيدائشي طور گفٽڊ ماڻهوءَ جڏهن ڪمزورماڻهن تي پنهنجو پاڻ کي برتر محسوس ڪرڻ شروع ڪن ٿا،جڏهن سيلف ميڊ جهڙا لفظ انسان جي روزمره جي زندگي جي حصو ٿي وڃن ٿا.جڏهن عزت پيسي جي ڳڻپ تي ملي،شين جي ڪثرت تي ملي،غربت،هيڻائي تي مهڻا ملن ته پوءِ اهڙي معاشري ۾ ڇڪتاڻ وڌيو وڃي.

خالق ڪائنات به چئي ٿو ته انسان کي  ڪثرت پسند آهي.نيٺ هن کي قبر ۾ داخل ٿيڻو آهي.پر هن جو ڌيان هن دنيا ۾ ظاهري مقابلي ۾ وڌيڪ آهي.

انسان جي ان هٿرادو فخري ڀيٽي معآشري تي شاه عبدالطيف ڀٽائي جو به هڪڙو بيت آهي.

مون تون آئون اسين چارئي چتان لاه،

ته سندي دوزخ باه تو اوڏيائي نه اچي.

سو انهن ٻن شين جي انساني زندگي تي پوندڙ منفي اثرات جي آگاهي ڏيڻ کانپوءِ آئون هڪ اهم نقطو پيش ڪرڻ گھران ٿو.

اسان مان هرهڪ انسان آزاد آهي،ضروري نه آهي ته هو ويهي ان تبديلي جو انتظار ڪري ته معاشري جا معيار تبديل ٿين ته پوءِ پنهنجو پاڻ کي تبديل ڪريان.

جيڪڏهن ڪو شخص پنهنجي زندگي ۾ مثبت تبديلي آڻڻ چاهي ٿو ته کيس ان شمارياتي ۽ ڀيٽي معاشري جي محدوديت ۽ ترجيحات مان نڪري پنهنجي زندگي جا فيصلا پاڻ پنهنجي ترجيحات ۽ رجحان مطابق ڪرڻا پوندا.

اسان کي پنهنجي وجود جي اندر داخل ٿي پنهنجو پاڻ کي ڳولڻو پوندو.پنهنجي صلاحيتن جو اندازو لڳائي انهن کي اهميت ڏيڻي پوندي.ان ئي رخ ۾ بنا ڪنهن حجاب،ججھڪ جي محنت ڪرڻي پوندي.

ان لاءِ ترقي چاهيندڙ،پنهنجي زندگي ۾ مثبت تبديلي چاهيندڙ لاءِ ضروري آهي ته هو پنهنجي وجود کي معآشري جي منفي ،ڀيٽي وجود مان ڪڍي،پنهنجو پاڻ ۾ داخل ٿي وڃي.جڏهن هو اهوڪرڻ ۾ ڪامياب ٿي ويو تڏهن هن لاءِ ميار ۽ شابس جي اهميت هڪ جيتري ٿي ويندي.هن لاءِ مثبت تبديلي جي ڪوشش ۾ ايندڙ رڪاوٽون ۽ عارضي ناڪاميون هن جي دل کي نه ٽوڙينديون،پرهو پنهنجي جدوجهد ۾ اڻورچ ٿي لڳو رهندو ته نيٺ ڪاميابيون هن جا قدم چمدنديون.