ڪڙو لطيفو

ڪڙو لطيفو

سنه 2002 ع ۾ جڏهن ٽنڊو الهيار اڃا تائين ضلعونه بڻيو هو،پر ضلعي حيدرآباد جو هڪ تعلقو هو،ان جي هڪ گورنمينٽ ايليمينٽري اسڪول ۾ رسيس جي وقفي ۾ هيڊ ماسٽر صاحب جي آفيس ۾ ويٺا هئاسين.

تڏهن ”هاءِ اسڪول ٽيچرس“ ۽ ”جونيئر اسڪول ٽيچرس“ جي پوسٽن تي ڀرتيون به ”سنڌ پبلڪ سروس ڪميشن“ جي ذريعي ڪيون ويون هيون.ان اسڪول ۾ اسان تازو ڀرتي ٿيل ٽي ”جونيئراسڪول ٽيچر“ ۽ ”هڪ هاءِ اسڪول ٽيچر“ جنهن کي ان اسڪول ۾ هيڊ ماسٽر ڪري رکيو ويو هو،ڪم ڪري رهيا هئاسين.ان کان پهريائين ان اسڪول کي صرف هڪ جونيئر اسڪول ٽيچر هلائي رهيو هو،جيڪو ٻئي هاءِ اسڪول مان هن ايليمينٽري اسڪول ۾ ڊيپوٽيشن تي ڪم ڪرڻ لاءِ موڪليو ويو هو.اهو استاد اسان جي هن اسڪول ۾ مقرر ٿيڻ کان پوءِ به ڪجھ مهينن تائين ان اسڪول ۾ ڪم ڪندو رهيو.

اسان ٻه جونيئر اسڪول ٽيچر هڪ ئي ڳوٺ جا هئاسين،جڏهن ته هيڊماسٽرصاحب جو تعلق حيدرآباد شهر سان هو.

گفتگو دوران هيڊ ماسٽر صاحب چيو ته ڪي لطيفا ٻڌايو ته ذهن ڪجھ تروتازه ٿي وڃي،ان تي سڀ کان پهريائين منهنجي ڳوٺائي استاد لطيفو ٻڌايو،لطيفو ڏاڍو زبردست هو،ٻڌي اسان ٽهڪن ۾ ٻڏي وياسين،پر جيئن ئي اسان جي نظر هيڊماسٽر صاحب جي چهري تي پيئي ته اسين صفا ماٺ ٿي وياسون،ڇاڪاڻ ته هيڊ ماسٽر صاحب کليو ته ٺهيو پر مسڪرايائين به نه پر ماڳهين ڪاوڙ۾ ڀرجي ويو ۽ منهنجي ڳوٺائي استاد کي چيائين ته ”هي لطيفو هينئر جو هينئر ئي توهان منهنجي باري ۾ ٺاهيو آهي.“هن هيڊ ماسٽر صاحب کي وضاحت ڪندي ٻڌايو ته ”اهو لطيفو پراڻو آهي،۽ مون ان کي ڪنهن ڪتاب ۾ پڙهيو هو.“تڏهن مون به اهو لطيفو پهرين دفعي ٻڌو هو،پر پوءِ ڪنهن ڪتاب ۾ پڙهي ڏٺم ته واقعي اهو لطيفو اڳيئي ٺهيل هو.
لطيفو
ماءُ پٽ کي ننڊ مان اٿاريندي،”ابا!ابا! ننڊ مان اٿ،توکي اسڪول وڃڻو آهي.“ ”نه نه امان آئون اسڪول ڪونه ٿو وڃان“ پٽس وراڻيو،ماڻس چيس ته ”ابا! ائين نه ڪر،اسڪول وڃ“ نه امان آئون اسڪول ڪو نه ٿو وڃان،اتي ته آئون ڪنهن کي به ڪونه ٿو وڻان“پٽس جواب ڏنو،ماڻس ننڊ مان اٿاريندي چيس ته”پٽ! ائين نه ڪر،تون اسڪول وڃ،تون ته اسڪول جو هيڊ ماسٽرآهين“